Larunbatean hainbat pertsona Gasteizko etxe batera sartu ondoren ertzaintzak beraien kontra jo zuen

«Emantzipatzeko ezintasunaren aurka», manifestazioa egin zuen atzo Gazte Koordinadora Sozialistak Gasteizen. Amaieran, esan zuten «ahalik eta gazte gehienen kontzientzia politikoa piztu eta etxebizitza unibertsalaren aldeko indarrak batu» behar direla, eta egoera larria dela: «Baina larria langileriarentzako, ez etxebizitzaren auzitik negozioa egiten dutenentzako; horiek dira gazteon emantzipazio ezintasunaren errudun nagusiak». 

Amaitutakoan, zenbait gazte hiriko Alde Zaharreko etxebizitza huts batera sartu ziren.

Handik eskegi zituzten «politikarien promesa faltsuen aurrean, emantzipatzeko eskubidea borrokatu» zioten pare bat pankarta, eta adierazi zuten, etxebizitza negozio iturri den bitartean, hauteskunde kanpainan egiten diren «promesa faltsuek» ez dutela balio.

Ertzaintzak gauean jo zuen etxebizitzaren kanpoaldean elkartutakoen aurka: borra kolpeka saiatu ziren atarian zeudenak sakabanatzen, eta haiei babesa ematera gerturatutakoen kontra ere oldartu ziren hainbat pertsona zaurituz eta gazte bat atxilotuz.

(Irudia:Gedar)